Madrilgo farmazialari hau Donostian finkatu zen 1887. urtean. Urte hartan bertan Donostiako Udalak Udal Laborategi Kimikoko zuzendari-lanpostua sortu zuen eta Cesar Chicote hautatu zuten, aho batez, lanpostu horretarako. Antolatu zuen laborategia erreferentziazkoa izan zen Estatuko gainerakoentzat. Estolderia-sarea eta eremu publikoetako desinfekzioa bultzatu zituen. Aitzindaria izan zen, halaber, hondakin solidoen gaikako tratamenduari eta hondakin organikoak erretzeari dagokienez. Farmazialari-lanetan ere aritu zen San Antonio Abad Ospitalean. 1898. urtean Madrilgo Udal Laborategiko buru izendatu zuten.