COMGI

Koronabirusaren Krisiaren aurrean Laguntza Psikologikoa emateko Programa

Zer da eta norentzat da?

Pandemia egoera honek lankide asko eta askorengan eragiten ari den sufrimendu psikologikoa arintzeko zerbitzua da hau. Arreta pertsonalizatua emango zaio eskatzen duen elkargokideari, arreta psikiatriko nahiz psikologikoa: elkarrizketa psikiatrikoa egingo da lehenik, egoera ebaluatu ahal izateko, eta, ondoren, saio psikoterapeutikoak eskainiko zaizkio beharko balitu.

Zein da helburua?

Programan sartzen diren medikuek beren lana baldintza onenetan egin ahal izatea eta Estres Postraumatikoaren Nahasmendua prebenitzeko beharrezko tratamendua jasotzea dira programaren helburu nagusiak. Erresilientzia areagotzeko baliabideak garatzea izango da egingo den lanaren oinarria, banakako eta laguntza psikologiko espezifikoa bermatuz eta krisi-egoeri aurre egiteko baliabideak emanez.

Zein dira programaren baldintzak?

Doako laguntza-programa da elkargokideentzat, konfidentzialtasun hertsienean oinarritua eta PAIMEn sartua, higadura emozional eta psikologikoa saihesteko laguntza-tresna gisa.

Nola izan naiteke programaren onuradun?

Elkargoarekin harremanetan jar zaitez ohiko bideetatik (943 27 63 00  /info@comgi.eus) eta programarekin harremanetan jarriko zaituzte, beti ere, konfidentzialtasuna bermatuz. 

 

Zergatik jarri du martxan Elkargoak?

SARS CoV-2 Koronabirusaren krisiarekin bizitzen ari garen egoera guztiz ohiz kanpokoan, zuek egiten ari zareten lana pandemia hau geldiarazteko lanaren zutoinetako bat da. Ikusten ari garenez, sendagileen kolektiboaren ahalegina izugarria izaten ari da, baina horrek higadura fisiko nahiz emozional nabarmena eragin dezake, eta eragiten du dagoeneko.

Gure lanbideagatik, ohituta gaude egunerokoan gaixotasunen kontra borrokatzen, eta sendagileok baditugu tentsio handiko eta muturreko egoerei aurre egiteko baliabide psikologikoak. Hala eta guztiz ere, baliabide hauek ez dira mugagabeak. Babes psikologiko profesional bat izateak lagundu dezake norberaren gaitasunak indartzen, ez soilik salbuespenezko egoera honi aurre egiteko orduan, baizik eta medikuntzan bizi dugun egoera hau behin igarotakoan erator daitezkeen ondorio psikologikoak prebenitzeko ere.

Horregatik, Gipuzkoako Sendagileen Elkargoak, EAEko PAIME programatik eta Getaria 20 Psikiatria eta Psikologia Zentroarekin elkarlanean, «Koronabirusaren Krisiaren aurrean Laguntza Psikologikoa emateko Programa» eskaini nahi dizue elkargokideei.

Lan taldea ezagutu nahi baduzu, elkarrizketa hau irakur dezakezu: 

comgi.eus webgunean gure cookie propioak erabiltzen ditugu saioa hasteko eta besteenak bisiten analisia egiteko. Egin klik HEMEN informazio gehiagorako. Cookie guztiak onar ditzakezu "onartu" sakatuz edo horiei uko egin "baztertu" klikatuz